Выбрать язык
Книги Ветхого Завета
Книги Нового Завета
с русским текстом1Сэк ме казялі мӧдік вына ангелӧс, кӧда лэдзчисьӧ вӧлі енӧжсис. Сія вӧлі кытшӧвтӧм кымӧрӧн. Сы юр весьтын вӧлі енӧшка. Чужӧмыс вӧлі шонді кодь, а коккес вӧлісӧ биа керрез кодьӧсь.2Киас сылӧн вӧлі учӧт осьта сераку. Сія сувтӧтіс веськыт коксӧ саридз вылӧ, шульгасӧ ─ му вылӧ.3Сэк сія горӧтіс. Сылӧн шыыс вӧлі левлӧн рякӧстӧм кодь. Сы горӧтӧм бӧрсянь асланыс шыэзӧн пондісӧ баитны сизим гымалан.4Сизим гымаланлісь баитӧмсӧ ме лӧсьӧтчи гижны. Сэк енӧжсяняс меным вӧлі висьталӧм: «Сизим гымаланлісь баитӧмсӧ эн висьтась и эн гиж».
5Сэк саридз да му вылын сулалісь ангелыс, кӧдӧ ме адззылі, лэбтіс ассис веськыт кисӧ енӧжлань.6Сія сетіс кыв*а Пырся Олісьӧн, Кӧда аркмӧтіс енӧжсӧ да быдӧс сэтчинісьсӧ, мусӧ да быдӧс сы вылісьсӧ, саридзсӧ да быдӧс сэтчинісьсӧ. Сія шуис: «Кадыс сэсся оз ни ло.7Локтас кад сизимӧт ангеллӧ пӧльтны аслас буксанӧ. Сія лунӧ Еныслӧн тӧдлытӧм лӧсьӧтӧмыс керсяс. Сы йылісь Еныс одзжык висьтавлӧм Аслас раббезлӧ ─ Енсянь юӧртіссезлӧ».
8Сэк енӧжсяняс баитісьыс, кӧдӧ ме одзжык кылі ни, меным висьталіс: «Мун, босьт паськӧтӧм гижӧтсӧ ангелыс киись, кӧда сулалӧ му вылас да саридз вылас».9Ме сибӧтчи ангелыс дынӧ да кори серакусӧ. Сія меным висьталіс: «Босьт серакусӧ да сёй. Кынӧмат сысянь лоас курыт, а ӧмат лоас ма кодь чӧскыт».10Ме босьті серакусӧ ангелыс киись да сёйи. Ӧмам сія вӧлі ма кодь чӧскыт, а гыркӧс курытсяняс пондіс сотны.
11Ангелыс сэтӧн меным висьталіс: «Тэныт бӧра колӧ Енсянь юӧртны, мый лоас быдкодь отиркӧт, чужан вужжезкӧт, быд кыв вылын баитісь йӧзкӧт, ӧксуэзкӧт».
*а 10.6 кыв сетны ─ поклясться
Глава 10