Выбрать язык
Книги Ветхого Завета
Книги Нового Завета
с русским текстом1Воннэзӧ, ӧтамӧднытӧ пыр радейтӧ.2Эд вунӧтлӧ рочавны мунісь-локтіссесӧ. Мукӧдыс тӧдтӧг сідз рочавлӧмась гортаныс ангеллэзӧс.3Эд вунӧтлӧ отсавны пукаліссеслӧ, жыв и тійӧ ныкӧт ӧтлаын пукалат. Отсалӧ и нылӧ, кӧдналӧ лёк кериссезсянь умӧльыс усьӧ. Тійӧ эд кытчӧдз и асьныт му вылас олат.
4Гозъя коласын ась быдӧс керсьӧ бӧбӧттӧг. Ас коласын овтӧн ась быдӧс лоӧ сӧстӧм. Гозйӧн овтӧн ӧтамӧд сайсянь ветлӧтіссесӧ да кыскасиссесӧ быдӧннысӧ эд Еныс пондас судитны.5Эд пуктӧ ловнытӧ сьӧм радейтӧмӧ. Тырмӧтчӧ сійӧн, мый эм. Ачыс Еныс эд висьталіс:
─ Ог коль тэнӧ,
ог чапкы.
6Сійӧн мийӧ повтӧг висьталам:
─ Мыйись меным повны,
мый меным мортыс керас,
менам отсасисьыс кӧ Дӧсвидзись?
7Видзӧ тӧдвыланыт ассиныт велӧтіссезнытӧ, кӧдна висьтасисӧ тіянлӧ Енлісь Кывсӧ. Видзӧтӧ, кыдз нія олісӧ, да ны моз веритӧ.8Кристос Исусыс некӧр оз вежсьы, Сія тӧн, талун да и пыр Сія жӧ.9Йӧзыслӧн уна быдкодь велӧтӧммес, эдӧ лэдзӧ нійӧн асьнытӧ ылӧтны. Сёян-юан йылісь велӧтӧмсӧ оз ков сьӧлӧмӧ босьтны. Эз вӧв бурыс нылӧ, кӧдна сы сьӧрті олісӧ. Буржык вынсьӧтны сьӧлӧммезнымӧс Енлӧн бурсетӧмӧн.
10Миян эм езъяланін. Скинияас уджаліссеслӧ сы вылісь оз туй сёйны.11Аркирейыс отирлісь умӧль керӧммесӧ лэдзӧм понда Вежася-вежаинас пыртӧ подалісь вир. А начкылӧм подасӧ сотӧны кар саяс.12Сійӧн и Исусыс куліс карас пыран ыбӧссэз сайын, медбы отирсӧ Аслас вирӧн керны вежаэзӧн.13Сідзкӧ, петам Исусыс дынӧ кар саяс, медбы и миянлӧ Сы моз новйӧтны сералӧм-умӧльтӧмсӧ.14Миян эстӧн эд абу пырся карыс. Мийӧ видзчисям одзланься виль карсӧ.15Сідзкӧ, Исусыс пыр пондам дугдывтӧг лэбтыны-ошкыны Енлісь нимсӧ. Миян ӧмись петӧм ошкӧмыс Еныслӧ езъялан козин.16Эд вунӧтлӧ керны бурсӧ. Мыйӧн вермат, отсасьӧ. Сэтшӧм езъялан козиныс Еныс сьӧрті.
17Кывзісьӧ тіян вылын сувтӧтӧммесӧ. Керӧ висьталӧмныс сьӧрті. Нія дугдывтӧг эд тӧждісьӧны тіян понда. Нылӧ быдӧнныт понда ковсяс Еныс одзын кыв видзны. Тіянкӧт нія ась уджалӧны кокнит сьӧлӧмӧн. Пондасӧ кӧ нія сьӧкыта ышлолавны, тіянлӧ сэтісь оз ло бурыс.
18Кеймӧ миян понда. Мийӧ тӧдамӧ, миян сьӧлӧммезным сӧстӧмӧсь, мийӧ эд быдӧс вынсьӧтчам керны веськыта.19Кора тіянӧс, ӧддьӧнжык кеймӧ, медбы ме чожажык верми бертны тіян дынӧ.
20Лӧньсӧ сетісь Еныс
ловзьӧтіс кулӧмись
миянлісь Дӧсвидзись Кристос Исуссӧ,
вына баля Видзӧтісьсӧ.
Сы вирӧн миянлӧ керис пырся Йитӧт.
21Еныс ась вынсьӧтӧ тіянӧс
керны быдпӧлӧс бурсӧ,
медбы быдӧс вӧлі Сы сьӧрті.
Кристос Исусыс пыр ась керас миянӧс сэтшӧммезӧн,
кытшӧмӧсь мийӧ Сылӧ колам.
Сылӧ пырся-пыр ошкӧм! Аминь.
22Воннэзӧ, кора тіянӧс: видзсьӧ этна велӧтана кыввез бердӧ. Ме эд унасӧ эг гиж.23Тӧдӧ: миянлісь Тимофей воннымӧс лэдзисӧ. Сія чожа кӧ локтас татчӧ, сэк ме ӧтлаын сыкӧт локта тіян дынӧ.
24Миянсянь юӧр сетӧ велӧтіссезнытлӧ да быдӧс вежа отирлӧ. Тіянлӧ юӧр ыстӧны Италиясис Кристос отирыс.
25Еныслӧн бурсетӧмыс ась лоас тіянкӧт быдӧнныткӧт! Аминь.
Глава 13