Выбрать язык
Книги Ветхого Завета
Книги Нового Завета
с русским текстом1Веритӧмыс ─ видзчисьӧм сьӧрті олӧм, тыдавтӧмсӧ тӧдӧмӧн видзчисьӧм*а.2Веритӧмныс понда миян айезным вӧлӧмась Еныслӧ сьӧлӧмви.
3Веритӧмнаным мийӧ пондім тӧдны: муэз да енӧжжез быдӧс аркмӧтӧмӧсь Ен Кылӧн. Сідз тыдавтӧмсис аркмис тыдаланаыс.
4Веритӧмӧн Авельыс вайӧм Еныслӧ езъялан козинсӧ Каинысся буржыкӧ. Веритӧмыс понда Еныс пуктіс сійӧ веськыта олісьӧ да босьтіс сылісь козинсӧ. Веритӧмнас сія и кулӧм бӧрас ӧнӧдз баитӧ.
5Веритӧмыс понда Енокыс вӧлі босьтӧм енӧжас кувтӧдззас: «Сія эз ло, Еныс эд сійӧ босьтіс». Енӧжас босьтӧмӧдз тай сылӧ вӧлі висьталӧм: «Сія мортыс Енлӧ сьӧлӧмви».
6Вериттӧг Ен сьӧрті он вермы керны. Еныс дынӧ локтісьлӧ колӧ веритны: Еныс эм, и Сійӧ кошшись мортлӧ Сія сетас козинсӧ.
7Веритӧмыс пыр Нойлӧ вӧлі сетӧм тӧдны тыдавтӧмсӧ, одзланьсясӧ. Енсӧ кывзісьӧмӧн сія керӧм ыджыт пыж, медбы мездыны васис ассис гортіссесӧ. Веритӧмӧн керӧмнас сія судитӧм му вывсис быдӧс оліссесӧ. Ачыс веритӧмыс понда вӧлі сувтӧтӧм веськыта олісьӧн.
8Веритӧмӧн Авраам кывзісьӧм Енсӧ да мунӧм сія муӧ, кӧдӧ Еныс сылӧ вӧлі кӧсйӧм. Сія абу тӧдӧм, кытчӧ мунӧ, но мунӧм.9Веритӧмӧн сія олӧм кӧсйӧм муас палаткаэзын, кыдз йӧз муын. Сёрӧнжык Исакыс да Яковыс олӧмась сы моз. Авраамыс пыр и нылӧ эд вӧлі кӧсйӧм сія муыс.10Авраамыс видзчисьӧм сэтшӧм кар, кӧдалӧн пуктӧм увтыс*б ён. Сэтӧн Лэбтісь-Лӧсьӧтісьыс ─ Еныс.11Сарраыс абу вермӧм ваясьны, но веритӧмнас сія Енсянь босьтӧм вын сьӧктыны. Сія пӧрисьувья ни вайӧм кага. Сэтшӧм кадӧ эд озӧ ни ваясьӧ. Сія эд тӧдӧм: Кӧсйисисьыс ─ надейнӧй.12Сійӧн Авраамыссянь ─ ӧтік шоймӧм*в кодь мортсянь ─ чужис сымда отир, мымда енӧжын кӧдзуввез*г да саридз*д дорын песӧк.
13Нія быдӧнныс кулӧмась веритіссезӧн. Овтӧнняныс нылӧ кӧсйӧмыс эз вӧв сетӧм. Нія видзчисьӧмась одзланьсясӧ, ылісянь адззӧмась сійӧ да гажӧтчӧмась. Ас йывсиныс баитӧмась, му вылас пӧ мийӧ дзир локтіссез да муніссез.14Баитіссеслӧн сэтшӧма висьталӧмныс мыччалӧ: нія кошшӧны гортнысӧ.15Нія эзӧ видзӧ юраныс сійӧ мусӧ, кытісь петісӧ. Сэтчӧ нія вермисӧ бы и бертны.16Нія туйнысӧ видзӧмась буржыкысланьӧ, енӧжӧ. Сійӧн Еныслӧ абу рожа кулян Асьсӧ пуктыны нылӧн Енӧ. Сія лӧсьӧтіс нылӧ кар.
17Авраамыслӧн веритӧмыс вӧлі тӧдмалӧм-видзӧтӧм. Веритӧмӧн сія пуктӧм езъяланін вылас ассис ӧтка чужтӧм зонсӧ. Сія эд веритӧм кӧсйӧмыслӧ.18Эта зон йылісь эд вӧлі висьталӧм: «Исакыссянь чужӧммесӧ пондасӧ шуны тэнат челдяьӧн».19Авраамыс видзӧм юрас: Еныс вермас ловзьӧтны и кулӧмсӧ. Сія бӧр сідз и босьтӧм Исаксӧ, жыв сія кувлӧм и ловзьӧм.
20Исакыс одзланьсяас веритӧмӧн бласлӧвитӧм Яковсӧ Исавыскӧт.21Яковыс кулікас веритӧмӧн бласлӧвитӧм Ӧсиплісь быд зонсӧ да бедьыс бердӧ видзсьӧмӧн копыртчӧм Еныслӧ.22Веритӧмӧн Ӧсипыс кулӧм одзас казьмӧтлӧм Израиль отирлӧн Египетсис петӧм йылісь да тшӧктӧм ассис лыэсӧ петкӧтны.
23Моисейсӧ чужӧм бӧрсяняс ай-мамыс веритӧмныс кузя дзебӧмӧн видзӧмась куим тӧлісь. Нія эд адззӧмась: кагаыс ӧддьӧн басӧк. Абу повзьӧмась и фараонлӧн висьталӧмись.24Моисейыс быдмӧм. Веритӧмыссянь асьсӧ дугдӧм пуктыны фараон нывлӧн зонӧ.25Сія юрас пыртӧм: гажӧтчӧмӧн да умӧль керӧмӧн недыр олӧмся буржык пессьыны-мырсьыны ӧтлаын Енлӧн отиркӧт.26Кристос понда видӧмсӧ сія лыддьӧм донажыкӧн Египетсис быд дона торся. Сія видзӧтӧм одзланьсяыс вылӧ, мый сылӧ лоас сетӧм.27Веритӧмӧн Моисейыс петӧм Египетсис. Нельки абу повзьӧм ӧксуыс лӧгасьӧмись. Сія видзсьӧм чорыта, жыв адззӧм одзсис Тыдавтӧмсӧ.28Веритӧмӧн сія тшӧктӧм чулӧтны Ыджыт лунсӧ да резны вирнас ыбӧс косяккесӧ, медбы кулӧтісь ангел эз вӧрӧт нылісь медодзза шогмӧммесӧ.29Веритӧмӧн Израиль отир мунӧмась Гӧрд саридзӧттяс му вылӧт моз. Ны вылӧ видзӧттӧн египетсаыс мӧдӧмась вуджны саридзсӧ да вӧйӧмась.
30Веритӧмӧн Израиль отирыс сизим лун сьӧрна гӧгралӧмась Ерикон карсӧ. Сизимӧт лунас кар гӧгӧрсис ёнся-ён из йӧрныс*е пӧрӧм.31Кыскасись инька Раав веритӧмыс кузя абу кулӧм мӧдік вериттӧммезкӧт. Сія эд бура панталӧм Израиль отирись Ханаан му видзӧтліссесӧ да мӧдіклаӧт кольлалӧм нійӧ.
32Мый висьтавны? Абу менам кадыс висьтасьны Гедеон, Варак, Самсон, Иеффай, Давид, Самуил да Енсянь юӧртіссез йылісь.33Тышкасьӧм коста нія веритӧмнаныс босьтлӧмась йӧз муэз, быдӧс керӧмась веськыта, босьтлӧмась Енсянь кӧсйӧмсӧ, тупкавлӧмась леввезлісь ӧммезнысӧ,34кусӧтлӧмась вына биэз, пышшывлӧмась лэчыт шыпуртісь, вынтӧммес вынсявлӧмась. Нія ёна видзсьӧмась мӧдік йӧзкӧт тышкасьӧм коста да вашӧтлӧмась йӧз отирсӧ.35Мукӧд инькаэзлӧн кулӧммезныс ловзьывлӧмась.
Мукӧдсӧ быдмоза дойдӧмӧн кувтӧдз вайӧтлісӧ. Нійӧ кӧсйисисӧ лэдзны, но нія эзӧ босьтӧ отирсянь мезмӧмсӧ, а лӧсьӧтчисӧ ловзьыны буржык оланӧ.36Мукӧдыс вылын быд моз сералісӧ, вартлісӧ, дорлісӧ цеп вылӧ, пуксьӧтлісӧ.37Нійӧ шупкавлісӧ иззэзӧн кувтӧдз. Мукӧдсӧ быднёж зубытся-зубытӧдз вайӧтлісӧ, пилитлісӧ шӧри, мукӧдыс кувлісӧ шыпуртсянь. Баля да кӧза кучиккез вӧлісӧ нылӧ паськӧм туйӧ. Нылӧн эз вӧв нельки медколанаыс. Нійӧ вашӧтлісӧ, отирлӧн лӧгувьяныс лёк керӧмыс быдӧс усьліс ны вылӧ.38Нія, кӧдналісь и чуньпоннысӧ оз сулав быдӧс му вылісьыс, олісӧ кушмуэзын, керӧссэзын, керӧс гырккезын*ж, кырассэзын.39Веритӧмныс понда нія быдӧнныс вӧлісӧ Енлӧ сьӧлӧмви, но овтӧнняныс нія эзӧ босьтӧ кӧсйӧмсӧ.40Керсис этадз сійӧн, медбы нылӧ локны быдсӧн бурас миянкӧт. Еныс эд лӧсьӧтӧм миянлӧ мыйкӧ буржыкӧ.
*а 11.1 тӧдӧмӧн видзчисьӧм ─ уверенность
*б 11.10 увт ─ фундамент, основание
*в 11.12 шоймӧм ─ омертвелый
*г 11.12 кӧдзув ─ звезда
*д 11.12 саридз ─ море
*е 11.30 из йӧр ─ каменная стена
*ж 11.38 керӧс гырк ─ пещера
Глава 11